LEGJENDIS POPOLÂRIS: LE BARCJUTE DI SAN PIERI E SAN ZUAN TA’ BASSE FURLANE

A cura di Simona Drì

Cuanche ancjemò no arin le metereologjîe, il strolic, dutis chês sienzis e chêi argains che l’omp al dopre par predisi il timp o il destin da int, di solit si zirive di cjatâ rispuestis ‘ta nadure o ‘ta' tradiziôns dai vôns tramandadis di gjenerazion in gjenerazion.
Une usanze leade a chist timp dal an a je che da barcjute di San Pieri, che i nestris nônos e dopravin par proviodi cemût che e sares lade le annade agricole.
In te’ vilie dal vincjenôf di gjiuign (le gnot prime da festiviât dai Sants Pieri e Pauli) si usave cjapâ su une boze, un bocâl o une damiane di vêri e jemplâle di aghe fin ‘tal ûr; podopo cun delicateze, si faseve sbrissâ dentri il blanc di un ôf, senze lassasi scjampâ il ros.
Chiste boze e veve di sedi mitude fûr, sot di un arbul o ‘tal miez di un cjamp o dal curtîl, par sigurasi che e “cjapàs le rosade di San Piêri.
Il doman, a binôre, al sares vignût il miracul: drent ta l’aghe il blanc dal’ôf al vares cjapât le forme di une barcjute, cui arbui e lis velis. Plui chiste costruzion e sares sameade a une barcje cu’ lis velis spleadis, plui le anade e sares stade bune, e San Pieri al vares partât furtune, ben stâ, e salût a dute le famê.
Chiste tradizion, ’ta stese maniere dal pignarûl da Pifanîe, e are une vore spandude ‘tal nord est d’Italie, in particolâr in Friûl,in Venit, in Trentin e in Lombardîe; e are cjapade une vore sul seri, tant di rivâ a condizionâ li’ sieltis economichis e agricolis dai contadîns .
In ziartis zonis da Basse furlane, in particolâr a Porpêt, chiste usanze e are doprade ancje ta’ festivitât di San Zuan, ch’al cole il vincjequatri di gjiuign, e ripitude le vilie di San Pieri par conferme dal pronôstic vût in che dì.
In chiste zone in chist timp dal an al are ancje un altri fenomeni nadurâl ch’al merete cualchi peraule: le “montane” di San Pieri e San Zuan. Le montane e are un temporâl ch’al partave une ploie une vore fuarte che e veve côr di disfà cut il lavôr dai contadîns. Ma, e disin i vecjos dal paîs, e are ancje une bune ocasion par tendi i cogôi tal flunc e pescjiâ i bisats.
Ancje se cumô spes o vin cussì tantis informaziôns detaiadis che fidâsi da nadure e das credenzis popolaris e sameares une sielte rischiôse, nuje nus impedìs di provâ a fâ chiste barcjute cui nestris fruts, magâri par divertisi in famê e riclamâ a le memorie i timps passsâts. Cuissà che San Pieri nol vedi côr di induvinà miôr che no il strolic!


LEGGENDE POPOLARI:
LA BARCHETTA DI SAN PIETRO E DI SAN GIOVANNI NELLA BASSA FRIULANA

Quando ancora non c’erano la meteorologia, l’oroscopo e tutte quelle scienze e quegli strumenti che ora usiamo per predire il tempo o il futuro delle persone, di solito si cercava di trovare delle risposte nella natura o nelle tradizioni degli antenati tramandate di generazione in generazione.
Un’usanza legata a questo periodo dell’anno è quella della barchetta di San Pietro, tradizione che i nostri nonni usavano per prevedere come sarebbe andata l’annata agricola. Nella vigilia del ventinove giugno (la notte che precedeva la festività dei santi Pietro e Paolo) si soleva prendere una brocca, un boccale o una damigiana d vetro e riempirla con dell’acqua fino all’orlo, poi, con delicatezza, si faceva scivolare dentro l’acqua l’albume di un uovo, curandosi di non lasciarci scappare il tuorlo. Questa brocca, poi, doveva essere messa fuori, sotto un albero, in mezzo a un campo o nel cortile, affinché prendesse la cosiddetta “rugiada di San Pietro”. L’indomani, a buon mattino, sarebbe apparso il prodigio: nell’acqua l’albume rappreso avrebbe assunto la forma di un veliero, con tanto di alberi e vele. Più questa costruzione sarebbe stata simile ad una barca con le vele spiegate, meglio sarebbe andata l’annata, e San Pietro avrebbe quindi portato fortuna, benessere e salute a tutta la famiglia.
Questa tradizione, come il “pignarûl” (falò) dell’Epifania, era molto diffusa nel nord est dell’Italia, in particolare nelle regioni del Friuli, del Veneto, del Trentino e della Lombardia; veniva presa molto sul serio, tanto da condizionare addirittura le scelte economiche ed agricole dei contadini.
In certe zone della bassa friulana, in particolare a Porpetto, questa usanza era stata adottata anche durante la festività di San Giovanni, che cade il ventiquattro giugno, e poi ripetuta la vigilia di San Pietro per confermare il pronostico ricevuto in quel giorno.
In questa zona, in questo periodo dell’anno, vi è notizia di un altro fenomeno naturale degno di nota:la cosiddetta “montane” di San Pietro e San Giovanni.
La “montane” era un grosso temporale che portava una pioggia molto forte ed abbondante, tanto da rischiare di rovinare completamente tutoli lavoro dei contadini. Tuttavia, testimoniano i vecchi del paese, era anche una buona occasione per tendere le reti (i cosiddetti “cogôi” nel fiume per pescare le anguille.
Anche se ora, molto spesso, abbiamo così tante informazioni estremamente dettagliate che fidarsi della natura e delle credenze popolari sembrerebbe una scelta parecchio rischiosa, niente ci impedisce di provare a costruire questa barchetta assieme ai nostri bambini, magari per divertirsi in famiglia e ricordarsi assieme dei tempi passati. Chissà, magari potremmo scoprire che San Pietro ne sa una più dell’oroscopo!